喝彩

星期日去了葵青劇院看"喝彩"這套音樂劇，好正！！底佢可以第四度公演！

除了劇情很感人和勵志外，當中最值得欣賞的是可以聽番陳百強同張國榮好多好好聽既舊歌，成四十二首咁多，真係值得入場睇，各位如果有興趣，睇黎要等佢第五度公演喇！不過亦可暫時到這裏看看短片：

http://hk.myblog.yahoo.com/iam-garytam/article?mid=10865&prev=10866&next=10845

2nd Degree

姐姐經過三年多的半工讀終於讀完個2nd degree，星期日那天和她的同學去到香港大學影畢業相，雖然天色不是太美，但這個港大的main building都要影吓既

而她的朋友更唔話得，做當天的"大會攝影師"，瞓身影相唔少得，更企埋上台度攞位，呢ｄ朋友認真唔話得，簡直一流呀！

若你能看見

今日難得四點可以離開學校，抬頭望天－－

漂亮極了，一片一片的白雲，令我想起"若你能看見"這首詩歌：

如若你能看見藍天，能望到千朵白雲隨風轉，

願你不忘記感謝神，能看見絕未必然。

如若你能聽到潮聲，能聽見千萬狂濤飛濺，

願你不忘記感謝神，能聽見乃主恩典。

環顧世上不知幾多眼睛，連自己雙手亦無從一見，

若你抬頭仍舊見藍天，請緊記凝望多遍。

環顧世上數不清的耳朵，連父親聲音亦從未聽見，

若你偶然緩步至岸邊，請多聽潮浪一遍。

廿五週年步行籌款

今年是學校的廿五週年校慶，打頭炮的大型活動是今天舉行的步行籌款活動。行的路不是很難行，只是由學校沿著城門河行至沙田中央公園，且天氣十分好，藍天加太陽，所以人的心情也特別開朗。
雖然這段路不難行，但各方好友如有興趣支持我的話，可以用mail或電話通知我，等我替你們填表，無任歡迎^.^
MORE PHOTOS:
http://good-times.webshots.com/slideshow/561471191XjyZJP

Happy Halloween?

姪女昨晚來一個短catwalk，show show 其新買的披肩及南瓜筒－－皆因姪女的幼稚園今天讓學生穿任何衣服回校慶祝萬聖節，但其實學生們究竟明唔明Halloween係乜。抑或係大家對呢樣"扮鬼扮馬"的活動已漸漸接受？今早聽收音機得知一些大型商場花係Halloween佈置的金錢已差不多拍得住聖誕節，咁係咪即係意味住社會各界人仕亦越來越喜歡和吹捧這"玩意"？

學校旅行

昨天是學校旅行，校方為六年級同學舉辦左五人足球比賽，有幸我班的同學得了亞軍，而當中有份代表出場的同學更是令我另眼相看，不得不說天父給每個人的恩賜都不同，希望他們開心之餘，亦學會感恩和善用恩賜。
當中有幾個是在堂上常搗蛋的同學呢！

阿森與莎莉的花far世界

星期六與同事去了沙田大會堂欣賞由演戲家族主演的"阿森與莎莉的花far世界"音樂劇。起初只係因為知道有倫永亮的參與，相信不會太差，所以便答應和同事去看。怎知......嘩睇完之後發覺......冇得頂呀！！
演員方面唱家班的倫永亮及陳潔靈除了唱得好之外，係扮野方面更加叫人拍難手掌－－倫永亮扮狄娜、陳志雲；陳潔靈扮司棋姐都叫人笑到肚都痛。至於其他演員，個個都好唱得。
場景的佈置及燈光都配合得十分好。
其實成套劇咁成功，最功不可抹既當然係導演及編劇啦－－梁榮忠及彭鎮南，每首歌出現既位係劇中既出現都好夾，好PERFECT，總之一句講哂－－冇買錯飛、冇入錯場、冇走寶......
可惜只演三日，且已演完，各位暫冇機會欣賞了。

真與假

同事隻狗狗得意到有ｄ似假既咁，但佢係短短幾個月間已由"的的骰骰"既小狗變成現在這隻身形頗大的"小狗"(佢宜家先至六個月大咋！），勁呀，因為佢既食量驚人，而主人又唔得閒帶佢去做運動，所以身形與日俱增呢！

小可愛

星期六晚外出食飯時姪女無端端用紙巾放進鼻子內，佢並唔係因為感冒流鼻水，而係因為佢眼瞓，食飽飽後冇野做，便做出"古靈精怪”的行為打發時間，亦因為咁，她時常成為我們茶餘飯後的"玩具"、"話題"、"表演者"......

追、追、追

多謝各方好友仍冇離開這個咁冷清既地方^.^
相信做老師的近日應該都係係到追、追、追（不知大家是否和我一樣）：
追進度－－因為學生會係11月頭測驗，所以我好努地追趕緊進度，要係測驗前教完測驗範圍；
追功課－－因為學生的功課開始多同埋深，所以欠功課的人也略為多了，而我亦好努力咁追收他們所欠交的功課；
追改正－－學生們做功課未必一定會全對，有時叫佢地做改正仲難過叫佢做功課，每次改完作業看看上面那些"角仔"(摺角)，簡直旗海飄揚呀！

包裹(2)

麥國賢：我都想係08奧運的入場票，但可惜唔係；咁好上黎瀏覽兼留言呀！你今年仲有冇懶惰唔做功課呢？你五年級架喇，比多多多心機讀書呀，知冇？

ot:知ivy者莫若你了（雖然你答仲，但係今次係冇獎問答比賽）－－佢寄番一些"用完"既物番黎－－兩件短袖衫、兩本旅遊書、地圖、水袋、廿多枝由我送贈的鉛筆（本來佢諗住入西藏時送比當地的小朋友）及過往兩個月用完的車票

包裹

今早爸爸找我，話比我知要用IVY的passport去郵局代IVY取包裹（好彩之前冇托阿祖拿passport給IVY啫）－－我都估到係佢自己由中國寄來香港的，各位觀眾，你們估吓佢寄了甚麼回來？（比你地兩日時間估，星期一開估）

佢用了rmb70.8的運費再加rmb8的檢關費寄回來的，比較佢這兩個月的其他洗費，都算貴lor！

懶惰

超過一星期沒有update 個 blog了，原因很簡單－－懶惰，其實係因為我每日都係返工、教書、改簿、放工，可以說是平淡，但亦可以說是悠閒^.^，沒甚麼特別事情啫！
不過昨天就是開學以來最"遲"走的一天，成七點(其實比起去年已算早)，皆因學生的問題令我在放學後用了個多小時"見家長"，詳情不在此跟大家分享，只想大家繼續為我有智慧和耐性去處理他們的行為代禱，亦希望他們幾個都有耐性和毅力去改善自己。
其實今年除了六年級數要多花點時間預備外（因為很多年沒有教高年級數了），其餘所教的科目不是太難，但就是他們幾個"人仔"的事令我要花很多時間跟進和諗"計仔"對付，不過我相信他們總有一天會"醒"過來的！

感恩

經過一星期的祈禱（每日放學前我都跟他們祈禱）、訓練及"打磨"，我班的學生開始稍有"起息"，連之前比較"難搞"的那幾個學生都開始"醒悟"－－星期五叫他們寫"心語"(即類似週記的功課)，雖然我未曾認真及詳細批改，只是"係咁易"看看，但看到其中一個學生寫他會盡力改掉他的壞習慣，我真的由心笑出來，希望他能靠着天父的恩典、盡力地做好本份，做一個一天比一天進步的學生！右邊的立體作品便是他在暑假期間的功課，看這傑作便知他的能力不弱！

全新體驗

今天再一次踏入課室，面對一班六年級的同學，抱著"舊事已過，一切都變成新的了"及"每早晨都是新的"來面對那班學生，但......他們當中有幾個男同學的表現已令我感到非常"失望"，皆因他們又搗蛋，又硬頸，又無自信，害得我第一天第一個小息便要"捉"他們到教員室外的走廊企企及訓話。雖然之前都略知他們這班較"鬆散"，而我抱的心態是"一切重新開始"（因我相信人會變），但估唔到的是他們已將自己"定型"，覺得老師會將他們過往的事蹟延續落黎，永冇"翻生機會"，盼望他們這心態能改，否則......他們只會放縱下去，而我今年則有排搞了。

新人

近日在學校參與不同科目的會議，開始感到自己像一個fresh grad的新人一樣，乜都要由頭學過，雖然今年任教的科目都是同過往一樣係四科（數學、聖經、電腦及普通話），但因為這間學校在學科上的運作與舊校的有很大的出入，故此要花一段時間學習和適應，又加上自己去年不用做班主任，今年要做番（仲要係六年級呀），有很多班務要處理，所以似足一個新人一樣，每事問，好彩同事都好好人，有問必答，仲好詳細添！

多謝校長

7月23日回新校開會，背著那個平常用的背囊（兩個膊頭有Winnie the POOH, Piglet及Eeyore三個小公仔)，午飯去飲茶時校長看到，並與我進行了下面的對話：

校：少玉，你好鍾意Winnie the POOH架？掛晒ｄ公仔係個背囊到！

我：係呀，可惜未齊，"差"跳跳虎

校：若果我第日行街見到既話買比你呀！

我：好ar，多謝先喎

一個月後......校長叫我入校長室傾完工事後，係台面攞左隻跳跳虎比我，然後話：我記得之前話送隻跳跳虎比你既！嘩......我差ｄ唔識比反應佢，傻笑及冷靜一陣後，即刻回應一句：我以為你之前講吓笑咋！不過呢隻唔以掛係背囊到喎，anyway多謝校長......哈哈^.^

創意－－廢物利用

這是阿銘離開束河時交給YH職員轉交給IVY的東西，估吓阿銘給IVY什麼？第一個估中的有獎！佢用了一個早前我們在餐館食飯食剩多取的外賣盒裝住，連YH的職員知道裏面的東西後都話佢有創意，我就話佢係廢物利用，因為斷估佢都唔會將呢個盒攞番香港做紀念呱^.^不過佢寫錯左個"微"字 呀，冇草花頭架！！

旅途中遇到的......

8 月1日昆明－－兩位廣州女子，沒有問她們的姓名，只知道她們在昆明買了很多很便宜的薯片回廣州（多到連背包也裝不下）


8月3日束河－－住宿客棧（自由歲月）的"老闆"，王大哥，很好人，為我們的行程提供了不少寶貴的意見

8月4日束河－－狗爸爸（巴利），牠是王大哥所飼養的"小狗"(身型上)，牠帶我們上山及回客棧，每當我們停下來影相時，牠便會先行"探路"，確保我們所行的路是安全的！

8月5日虎跳峽－－一對法國情侶，好勤力，有備而戰，寫好晒有用的資料（如中文字）來遊玩

8月6日虎跳峽－－台灣大哥（蔡老師），家有妻兒（才兩個月大）仍獨自一人來雲南遊玩兩個星期，勁呀（我話佢老婆，咁都肯放人^.^）

8月6日虎跳峽－－包車司機，楊老師，趁暑假出來開車賺"外快"

8月8日文海－－"壹餐館"的老闆，我們本想借洗手間用，怎知他好人得不得了，除了沖茶給我們喝外，還讓我們參觀他每一間出租的房，任我們拍照，真好人；他十分健談，相信是因為他的仔女已出外工作，只剩他一人在打理旅館，所以每當見到外人（遊客）便會很熱情的招呼

8月8日束河－－在江蘇讀BBA的弟弟、在湖南讀法律的大哥，他們都是十分健談的人，滔滔不絕>.<

8月12及13日束河－－上海老師，對於她的事不太清楚，只知她好願意花錢買衫，就是因為這原因，她在晚上睡覺時亦經常大大聲發開口夢，把我們吵醒>.<

8月14日香格里拉－－湛江朋友，三香港女子在香格里拉遇上三湛江女子，其中有兩位亦是老師，大家叫做同聲同氣（識講廣東話），後來我和妙婷在昆明的駝峰客棧又遇上她們

8月14日香格里拉－－韓國父子，就憑韓國爸爸自學回來那簡簡單單的普通話及中文字，就帶同十三歲的仔仔來中國遊玩，永遠都不會忘記他用很開心的語調及很準確的普通話所說的"142元，很便宜！" ^.^這是韓國爸爸請我們食飯的餐館：

韓國父子

他們就是韓國父子了，亦即是同我地食飯食左142蚊仲話"很便宜"那位